चौधरी यांची ‘हिंद केसरी कुस्ती स्पर्धेसाठी निवड

पैलवान विजय चौधरी यांची ‘हिंद केसरी कुस्ती स्पर्धेसाठी निवड

पनवेल, ता. ११ (बातमीदार) : नवी मुंबई पोलिस दलातील वाहतूक विभागाचे सहाय्यक पोलिस आयुक्त तसेच सलग तीन वेळा ‘महाराष्ट्र केसरी’ विजेता आणि जागतिक पोलिस सुवर्णपदक विजेता पैलवान विजय चौधरी यांनी पुन्हा एकदा आपल्या दमदार कामगिरीने राज्याचे नाव उज्ज्वल केले आहे. भारतीय शैली कुस्ती महासंघ व महाराष्ट्र राज्य भारतीय कुस्ती संघ यांच्या मान्यतेने पुणे जिल्ह्यातील राष्ट्रीय कुस्ती संकुल, वडकी येथे पार पडलेल्या ‘हिंद केसरी निवड चाचणी’ कुस्ती स्पर्धेत त्यांनी ऐतिहासिक विजय मिळवत ‘हिंद केसरी २०२५-२६’ स्पर्धेसाठी पात्रता मिळवली आहे.
१५ ते २० जानेवारी २०२६ या कालावधीत सातारा जिल्ह्यात होणाऱ्या हिंद केसरी स्पर्धेत पै. चौधरी महाराष्ट्राचे प्रतिनिधित्व करणार आहेत. या निवड चाचणीत त्यांनी अत्यंत दमदार प्रदर्शन करत सलग चार कुस्त्यांमध्ये विजय मिळवला. या सर्व सामन्यांत चौधरी यांनी सादर केलेल्या वेगवान, रणनीतीपूर्ण आणि आक्रमक खेळीला उपस्थित प्रेक्षकांकडून प्रचंड उत्स्फूर्त प्रतिसाद मिळाला. स्पर्धा संपल्यानंतर भावना व्यक्त करताना पै. विजय चौधरी म्हणाले, “महाराष्ट्र पोलिस दलाचे पोलिसिंग कर्तव्या बरोबरच खेळातसुद्धा महाराष्ट्र पोलिसांचे देशभर नाव उज्ज्वल ठेवणे हा माझा ध्यास आहे. कुस्ती क्षेत्रातील मानाचा ‘हिंद केसरी’ किताब महाराष्ट्र पोलिस दलाच्या नावावर करण्यासाठी मी सर्वस्वाने प्रयत्न करणार आहे.” चौधरी यांच्या या उल्लेखनीय यशाबद्दल महाराष्ट्र पोलिस दल, नवी मुंबई पोलिस आयुक्त मिलिंद भारंबे, तसेच सर्व वरिष्ठ अधिकाऱ्यांनी त्यांचे मनःपूर्वक अभिनंदन केले. पुढील हिंद केसरी स्पर्धेसाठी शुभेच्छा दिल्या आहेत.