उघड्या दरवाज्यावाटे घुसून चोरी करणारा जेरबंद ; चार गुन्हे उघडकीस

मुंब्रा परिसरातून अटक
ठाणे-नवी मुंबईतील चार गुन्ह्यांची कबुली
सकाळ वृत्तसेवा
ठाणे, ता. १२ : शीळडायघर येथील सत्यनाथन व्यकंटेशन (३७) याला ठाणे गुन्हे शाखेने अटक केली. तर, चौकशीत त्याने ठाणे आणि नवी मुंबई पोलिस आयुक्तालयातील चार गुन्ह्यांची कबुली दिली असून त्यातील दोन लाख १४ हजारांचा मुद्देमाल हस्तगत केला आहे, अशी माहिती पोलिसांनी दिली.
शीळ डायघर पोलिस ठाण्याच्या हद्दीत ३० ऑक्टोबर रोजी भूमी लॉन्स इमारतीतील घरातून सकाळी साडेसातच्या सुमारास एका अनोळखी व्यक्तीने घरात घुसून मोबाईल चोरून नेला होता. याप्रकरणी गुन्हा दाखल करण्यात आला होता. याचा तपास ठाणे गुन्हे शाखा, घटक-१ यांच्यामार्फत सुरू असताना या गुन्ह्यामधील संशयित आरोपीने ३ नोव्हेंबर रोजी मानपाडा पोलिस ठाण्याच्या हद्दीत चोरी केल्याचा समोर आले. मानपाडा येथील चंद्रेश ज्योती सोसायटीत सकाळच्या वेळी आरोपीने चोरी केल्याचे निष्पन्न झाले. यानंतर घटनास्थळावरील सीसीटीव्ही कॅमेरा तपासला असता त्याचे छायचित्र त्यात कैद झाले होते. त्यानुसार त्या चोरट्याला मंगळवारी (ता. ११) रोजी मुंब्रा परिसरातून ताब्यात घेण्यात आले. चौकशीत त्याने दाखल गुन्हयांच्या व्यतिरिक्त नवी मुंबई परिसरातून रबाळे व खारघर पोलिस ठाण्याच्या हद्दीतील आणखी गुन्ह्यांची कबुली दिली. त्याच्याकडून त्या चार गुन्ह्यातील पाच मोबाईल फोन, दोन लॅपटॉप, एक घडयाळ असा दोन लाख १४ हजारांचा मुद्देमाल जप्त करण्यात पोलिसांना यश आले.