जोगेश्‍वरी दुर्गानगर बसथांबा प्रवाशांसाठी त्रासदायक

जोगेश्‍वरी दुर्गानगर बसथांबा प्रवाशांसाठी त्रासदायक
जोगेश्‍वरी, ता. १३ (बातमीदार) : जोगेश्वरी-विक्रोळी लिंक रोडवरील दुर्गानगर बसथांबा प्रवाशांसाठी मोठा गैरसोयीचा ठरत आहे. बसथांब्याभोवती रस्त्यावर कचरा आणि बांधकामातील राडारोडा टाकलेला असून, पादचारी मार्गही अडलेला आहे. यामुळे प्रवाशांना धोकादायक परिस्थितीत रस्त्याच्या मध्यभागी उभे राहून बस पकडावी लागते. बसथांब्याजवळील वाहन दुरुस्ती गॅरेजमध्ये गाड्या उभ्या केल्या जात असल्याने बसथांब्याजवळ येऊ शकत नाही. त्यामुळे बसचालकांना मध्येच थांबावे लागते आणि प्रवाशांना वाहनांमधून वाट काढत बसमध्ये चढावे लागते. या ठिकाणी शेड नसल्याने उन्हाळ्यात उकाडा आणि पावसाळ्यात भिजत उभे राहावे लागते. बसथांब्याजवळील कचरा व अतिक्रमण तातडीने हटवून प्रवाशांसाठी सुरक्षित जागा निर्माण करावी, अशी मागणी स्थानिक नागरिकांनी केली आहे.