काँग्रेस पदाधिकाऱ्याचा धावत्या एक्स्प्रेस मधून पडून मृत्यू

एक्स्प्रेसमधून पडून काँग्रेस पदाधिकाऱ्याचा मृत्यू

शहापूर, ता. १३ (वार्ताहर) : बुलढाणा जिल्ह्यातील चिखली तालुका काँग्रेस कमिटीचे माजी अध्यक्ष, बाजार समितीचे माजी सभापती आणि पैठण विधानसभा मतदारसंघाचे निवडणूक प्रभारी डॉ. सत्येंद्र भुसारी यांचा बुधवारी (ता. १२) कसारा रेल्वेस्थानकाजवळ झालेल्या अपघातात मृत्यू झाला.
पोलिसांनी दिलेल्या माहितीनुसार, बुधवारी पक्षाची बैठक संपल्यानंतर डॉ. भुसारी हे मुंबईवरून चिखलीकडे परत येत होते. रात्री ८ वाजण्याच्या सुमारास कसारा घाटात ते धावत्या एक्स्प्रेसमधून पडले. या अपघातात डोक्याला गंभीर दुखापत झाल्याने त्यांना तत्काळ नाशिक जिल्ह्यातील रुग्णालयात नेण्यात आले. मात्र उपचार सुरू होण्यापूर्वीच त्यांचा मृत्यू झाला होता. याप्रकरणी संबंधित रेल्वेगाडी कासारा स्थानकावर थांबत नसल्याने नेमका अपघात कसा घडला, याबाबत पोलिस तपास करीत आहेत.
डॉ. भुसारी यांनी मराठा सेवा संघाच्या माध्यमातून सामाजिक कार्याची वाटचाल सुरू करीत आपले स्थान निर्माण केले होते. त्यानंतर त्यांनी काँग्रेस पक्षात प्रवेश करून संघटन मजबूत करण्यासाठी सातत्याने कार्य केले. नुकतेच काँग्रेस पक्षाने त्यांची पैठण विधानसभा मतदारसंघ निरीक्षक म्हणून नियुक्ती केली होती. दोनच दिवसांपूर्वी छत्रपती संभाजीनगर जिल्ह्यात काँग्रेसचे निरीक्षक म्हणून त्यांनी संभाव्य उमेदवारांची बैठक घेतली होती. स्थानिक स्वराज्य संस्थांच्या आगामी जिल्हा परिषद निवडणुकीत ते इसोली जिल्हा परिषद गटातून निवडणूक लढणार होते.