घाटकोपरमध्ये रस्ता आणि उड्डाणपूलासाठी अतिक्रमणांवर महापालिकेची कारवाई

घाटकोपरमधील अतिक्रमणांवर पालिकेची कारवाई
घाटकोपर, ता. १३ (बातमीदार) : मुंबई महानगरपालिकेच्या एन विभाग कार्यालयाने घाटकोपर पश्चिमेकडील विकास आराखड्यातील रस्ता मोकळा करण्यासाठी मोठी मोहीम हाती घेतली. पालिकेने रस्ते आणि पदपथांवर अतिक्रमण करून उभारण्यात आलेल्या २४ अनधिकृत शेड व बांधकामे आज जमीनदोस्त केली. महापालिकेच्या पथकाने सकाळपासूनच कारवाई सुरू करत परिसरातील अडथळे दूर केले. झुनझुनवाला महाविद्यालय ते अंधेरी-घाटकोपर लिंक रोडदरम्यानचा १५.२५ मीटर रुंदीचा रस्ता यामुळे मोकळा झाला. याशिवाय अंधेरी-घाटकोपर लिंक रोडवरील नव्या रेल्वे उड्डाणपुलाच्या कामासाठी अडथळा ठरणारी ३५ अनधिकृत बांधकामे हटवण्याची प्रक्रियाही वेगाने सुरू असल्याची माहिती पालिका अधिकाऱ्यांनी दिली.