कल्याण पश्चिमेत १४ वर्षीय मुलीची आत्महत्या

कल्याणमध्ये १४ वर्षीय मुलीची आत्महत्या

कल्याण, ता. १३ (बातमीदार) : कल्याण पश्चिम येथील रोनक सिटी या इमारतीतून एका १४ वर्षीय मुलीने उडी मारून आत्महत्या केली. ही धक्कादायक घटना गुरुवारी (ता. १३) दुपारी घडली. मिळालेल्या माहितीनुसार, मृत मुलगी स्थानिक शाळेत शिक्षण घेत होती. गुरुवारी शाळेत ओपन डे असल्यामुळे ती दुपारी ३ वाजता घरी आली होती. परीक्षेमध्ये कमी गुण मिळाल्याने ती मानसिक तणावाखाली होती, अशी प्राथमिक माहिती समोर आली आहे.
शाळेतून आल्यानंतर तिने घराच्या १९व्या मजल्यावरील गॅलरीतून उडी घेतली. या घटनेची माहिती मिळताच पोलिसांनी घटनास्थळी धाव घेतली. पुढील तपास पोलिस करीत आहेत. या घटनेने कुटुंबावर दुःखाचा मोठा डोंगर कोसळला असून, परिसरात, शाळेत व नातेवाइकांत हळहळ व्यक्त केली जात आहे.