मुलुंड शिक्षण प्रसारक मंडळाचा स्टेज क्राफ्ट उपक्रम

‘स्टेज क्राफ्ट’ उपक्रमाचा दिमाखदार शुभारंभ
मुलुंड, ता. १५ (बातमीदार) : मुलुंड शिक्षण प्रसारक मंडळाने नृत्य, नाट्य आणि संगीत या कलांचे संवर्धन आणि पुढील पिढीत रुजवणूक करण्यासाठी ‘स्टेज क्राफ्ट’ या अभिनव उपक्रमाचा नुकताच शुभारंभ केला. या निमित्ताने शुक्रवारी (ता. १४) मुलुंड (प.) येथील महाकवी कालिदास नाट्य मंदिर येथे तीन बाल एकांकिका सादर करण्यात आल्या.
डॉ. यशवंतराव दोडे वर्ल्ड स्कूल, मुलुंड (पूर्व) येथील विद्यार्थ्यांनी ‘स्वप्नं राधेचं’, ‘मिशन होप’ आणि ‘जिनी ओ जिनी’ या मानवी मूल्ये आणि विज्ञानावर आधारित एकांकिका दमदार अभिनयातून सादर करत प्रेक्षकांची मने जिंकली. शिक्षक प्रशांत गुरव यांनी एकांकिकांचे दिग्दर्शन केले, तर शाळेचे माजी विद्यार्थी स्वराज दोडे आणि अरीन पाटकर यांनी संगीत दिले. मुख्याध्यापिका पियुष धारा सरन आणि माधवी मोमाया यांनी राजेश दोडे व श्वेता दोडे यांच्या मार्गदर्शनाखाली हा उपक्रम यशस्वी केला. विद्यार्थ्यांच्या उत्कृष्ट सादरीकरणानंतर प्रेक्षकांनी उभे राहून त्यांचे उत्स्फूर्त कौतुक केले.