टिटवाळ्यात रस्त्याचे डांबरीकरण सुरू

टिटवाळ्यात रस्त्याचे डांबरीकरण सुरू
‘दैनिक सकाळ’च्या बातमीनंतर प्रशासनाला जाग
टिटवाळा, ता. १५ (वार्ताहर) : टिटवाळ्यात वाहनांचा अडथळा, बेछूट पार्किंगमुळे अपघाताचा धोका; महापालिका प्रशासनाचे दुर्लक्ष ही बातमी ‘दैनिक सकाळ’मध्ये प्रसिद्ध होताच प्रशासानाला जाग आली आहे. प्रशासनाने तत्काळ रस्तादुरुस्तीची कामे हाती घेतली आहेत. गेल्या अनेक महिन्यांपासून रखडलेले रस्तादुरुस्तीचे काम अखेर बुधवारी (ता. १२) सुरू करण्यात आले.
मुख्य गणपती मंदिर रोड, स्थानकाकडे जाणारे मार्ग आणि गर्दीच्या चौकांमध्ये अनेक ठिकाणचे खड्डे वाहनचालकांसाठी जीवघेणे ठरत होते. या पार्श्वभूमीवर ‘दैनिक सकाळ’ने बातमी प्रसिद्ध करत प्रशासनाच्या निष्क्रियतेवर प्रकाश टाकला होता. याची दखल घेत महापालिकेचे कर्मचारी, कंत्राटदार आणि संबंधित विभागाची यंत्रणा तातडीने घटनास्थळी हजर झाली आणि खड्डे बुजवण्याचे काम सुरू झाले. कामगारांनी खडी व डांबर टाकून सपाटीकरण सुरू केले. काही ठिकाणी रोलर फिरवून रस्ता समतल करण्यात आला. या कामावर नागरिकांनी समाधान व्यक्त केले. दरम्यान, या कामांमुळे तात्पुरता दिलासा मिळाला असला, तरी दीर्घकालीन उपाययोजना आणि टिकाऊ रस्त्यांच्या मागणीवर स्थानिक नागरिक ठाम आहेत.

शहरातील रस्त्यांची अवस्था वारंवार बिघडू नये, तसेच अनधिकृत पार्किंगवर कारवाई करून वाहतुकीची शिस्त राखली जावी, यासाठी नागरिकांनी प्रशासनाला पुन्हा एकदा निवेदन देण्याचा मानस व्यक्त केला आहे. बातमीमुळे कामांना वेग मिळाल्याचा समाधानाचा सूर असला तरी, प्रशासनाने पुढील काळात तातडीने प्रतिसाद देत सातत्याने कारवाई केली पाहिजे, अशी अपेक्षा नागरिकांनी व्यक्त केली.