मालाडमधील मंदिर बचाव समितीची निदर्शने

जरीमाता मंदिरासाठी ‘बचाव समिती’चे आंदोलन
मालाड, ता. १५ (बातमीदार) : कुरार व्हिलेज येथील १९६० पूर्वीचे जरीमाता मंदिर सध्या येथील विकसकाच्या भूमिकेमुळे वादाच्या भोवऱ्यात सापडले आहे. मंदिराचा भूखंड विकसक घशात घालत असल्याच्या आरोपावरून मंदिर बचाव समितीने नुकतेच जोरदार आंदोलन केले.
मंदिराचे पुजारी, स्थानिक कार्यकर्ते, राजेश पांडे आणि ॲड. यादव यांच्या नेतृत्वाखाली हे आंदोलन पार पडले. ओंकार विकसकाने मूळ जागेवरच जरीमाता मंदिर बांधून द्यावे, अशी मागणी या वेळी करण्यात आली.
जागृत देवी असलेल्या मंदिराला धक्का लावण्याचा प्रयत्न खपवून घेतला जाणार नाही, असा इशारा स्थानिकांनी देत विकसकाने जानू भोये नगर येथील १४ सार्वजनिक मंदिरांकडेही दुर्लक्ष केल्याचा आरोप केला आहे. या आंदोलनाला आमदार बच्चू कडू यांच्या समर्थकांनीही पाठिंबा दिला. विकसक मूळ ठिकाणी मंदिर बांधून देत नाही तोपर्यंत आंदोलन मागे घेणार नाही, असा निर्धार समितीने केला आहे.