मोखाड्यात बिबट्याचा मुक्त संचार,

मोखाड्यात बिबट्याचा मुक्त संचार,
नागरिक दहशतीखाली

मोखाडा. ता. १५ ( बातमीदार ) ः पालघर जिल्ह्यातील अतिदुर्गम मोखाडा तालुक्यात बिबट्याचा मुक्त संचार आणि हल्ल्याची घटना समोर आली आहे. त्यामुळे तालुक्यातील नागरिक दहशतीखाली वावरत आहेत.
गेल्या आठवडाभरापासून मोखाड्यात वेगवेगळ्या भागात बिबट्याचा मुक्त संचार होत असल्याच्या घटना समोर आल्या आहेत. तसेच एका दुचाकीस्वारावर बिबट्याने हल्ला केल्याची घटनादेखील घडली आहे. तालुक्यातील वेगवेगळ्या भागात बिबट्या मुक्त वावरत असून, नागरिक तसेच प्रवाशांना त्याचे दर्शन घडत आहे. रात्री बिबट्या मोखाड्यातील खोडाळा- मोखाडा मार्गावरील देवबांध पुलावर बिबट्याचा मुक्त संचार प्रत्यक्ष बघितल्याने अनेक नागरिक हादरले आहेत, तर खोडाळ्यातील भैरवनाथ मंदिरानजीक बिबट्याचा वावर असल्याचे अनेक नागरिक व प्रवाशांनी बघितले आहे.
दरम्यान, अनेक शेतकरी आणि मजूर सद्यःस्थितीत भातकापणी तसेच भातझोडणीसाठी शेत आणि खळ्याजवळ वास्तव्य करत आहेत. बिबट्याचे त्यांनाही दर्शन घडल्याने, शेतीची कामे सोडून त्यांनी घरी राहणे पसंत केले आहे.