बातमीचा परिणाम (इम्पॅक्ट) ; सायन पुलाजवळ पोलीस पहारा

सायन पुलाजवळ पोलिसांचा पहारा!
धारावी, ता. १६ (बातमीदार) : सायन स्थानकासमोरील वाहतूक पूल नूतनीकरणासाठी गेल्या वर्षी ऑगस्ट महिन्यापासून वापरासाठी बंद करण्यात आला होता. त्यामुळे धारावीतून सायनच्या दिशेला जाण्यासाठी अडचणींचा सामना करावा लागत होता. यातून मार्ग काढत नव्याने पादचारी पूल उभा केला आहे. या पादचारी पुलावर प्रचंड गर्दी होत असल्‍याने कोणतीही दुर्घटना घडू नये, यासाठी येथे पोलिस तैनात करण्यात आले आहेत.
पादचारी पूल खुला झाल्याने पादचाऱ्यांनी समाधान व्यक्त केले होते. धारावीतून सायनच्या स्वामी श्री वल्लभदास मार्ग येथे हा पादचारी उतरतो, मात्र धारावीतील लक्ष्मी बाग विभागात वाहने पार्किंग करून ठेवल्याने तसेच रस्ता अरुंद असल्याने या ठिकाणी मोठी गर्दी उसळत होती. त्‍यामुळे एखादी दुर्घटना घडण्याची भीती व्यक्त करण्यात येत होती. यासंदर्भात ‘सकाळ’च्या १० नोव्हेंबरच्या अंकामध्ये वृत्त प्रकाशित करण्यात आले होते. याची दखल घेत धारावी पोलिस ठाण्याचे वरिष्ठ पोलिस निरीक्षक राजू बिडकर यांनी पोलिस पहारा ठेवल्याने पुलाखाली वाहन पार्किंग बंद झाली आहे. त्‍यामुळे पादचारी समाधान व्यक्त करत आहेत.