बालदिनाचा सर्जनशील जल्लोष.. बालदिनाचा सर्जनशील जल्लोष..

‘वर्तमानपत्र वेशभूषे’ची अनोखी स्पर्धा
वर्तमानपत्रातून फुललेली कल्पकता; इयत्ता पहिलीतील बालदिनाची आकर्षक वेशभूषा स्पर्धा
ठाणे, ता. १६ (बातमीदार) : बालदिनानिमित्ताने चरई येथील ब्राह्मण विद्यालयात पहिलीच्या विद्यार्थ्यांसाठी ‘वर्तमानपत्र वेशभूषा’ ही अनोखी स्पर्धा उत्साहात पार पाडली. लहानग्या मुलांनी वर्तमानपत्राचा वापर करून तयार केलेल्या आकर्षक व अनोख्या ड्रेससह रॅम्पवॉक केले. कागदापासून कलाकृती हे तत्त्व मुलांनी त्यांच्या कल्पनाशक्ती, डिझाइन, कटिंग आणि सजावटीच्या कौशल्यातून अप्रतिमरीत्या साकारले.
या कार्यक्रमासाठी संस्थेच्या अध्यक्षा सोमण, विद्यालयाच्या मुख्याध्यापिका वंदना चव्हाण, पूर्व प्राथमिक विभागाच्या मुख्याध्यापिका सारिका दामले आणि ज्येष्ठ शिक्षिका जसिंता पऱ्हाड उपस्थित होत्या. अध्यक्षा सोमण यांनी विद्यार्थ्यांच्या मेहनतीचे आणि आत्मविश्वासाचे मनापासून कौतुक केले. स्पर्धेतील विद्यार्थ्यांचे गुणांकन सादरीकरण, पोशाखाची रचना, नजाकत आणि आत्मविश्वास या निकषांवर करण्यात आले. पहिलीच्या वर्गशिक्षिका दिपाली देशमुख व किशोरी दाभोळकर यांनी विद्यार्थ्यांना मार्गदर्शन केले. बालकांच्या कल्पनाशक्तीतच उज्ज्वल भविष्य दडलेले असते या सुविचाराने कार्यक्रमाचा समारोप करण्यात आला. संपूर्ण कार्यक्रम पालक, शिक्षक व विद्यार्थ्यांच्या उत्स्फूर्त सहभागातून जल्लोषात पार पडला.