उमेदवारी अर्जांच्या शक्तीप्रदर्शनाचा फटका सामान्यांना!

उमेदवारी अर्जांच्या शक्तिप्रदर्शनाचा फटका
बदलापूरमध्ये तासभर वाहतूक कोंडी!
बदलापूर, ता. १७ (बातमीदार) : बदलापूर नगर परिषद निवडणुकीसाठी उमेदवारी अर्ज भरण्याच्या शेवटच्या दिवशी शिवसेना शिंदे गट आणि महाविकास आघाडीने केलेल्या जोरदार शक्तिप्रदर्शनामुळे शहरात अक्षरशः गोंधळाचे वातावरण निर्माण झाले. या राजकीय गर्दीचा थेट फटका सामान्य नागरिकांना बसला. बदलापूर पालिका परिसर, पूर्व-पश्चिम जोडणारा भुयारी मार्ग आणि स्वातंत्र्यवीर उड्डाणपूल या ठिकाणी वाहनांच्या लांबच लांब रांगा लागल्या होत्या.

रोज जे अंतर कापायला केवळ पाच मिनिटे लागतात त्या प्रवासासाठी नागरिकांना आज पाऊण ते एक तास थांबावे लागले. उमेदवारांच्या रॅली आणि कार्यकर्त्यांच्या वाहनांची प्रचंड गर्दी यामुळे शहरातील वाहतूक पूर्णपणे ठप्प झाली होती. वाहतूक कोंडीमुळे वाहनचालकांना मोठ्या अडचणींचा सामना करावा लागला. त्यातच घटनास्थळी वाहतूक पोलिसांचा मागमूसही नव्हता. दिशाहीन वाहतूक, हॉर्नचा कर्कश आवाज आणि अडकलेली वाहने असा त्रासदायक अनुभव नागरिकांना आला. निवडणूक प्रक्रियेच्या दिवशी तरी पोलिसांनी गस्त ठेवून वाहतूक नियंत्रण करणे अत्यावश्यक होते, अशी प्रतिक्रिया वाहनचालकांनी व्यक्त केली.