अनैतिक संबंधांच्या कारणावरून पत्नीचा खून

तलासरी, ता. १८ (बातमीदार) : मुंबई-बडोदा एक्स्प्रेस-वे पुलाच्या कामाच्या ठिकाणी आढळलेल्या अनोळखी महिलेच्या खून प्रकरणाचा तपास २४ तासांत उघड करण्यात पालघर पोलिसांना यश मिळाले आहे. अनैतिक संबंधांच्या कारणावरून पतीने तिचा खून केल्याचे तपासात उपड झाले. याप्रकरणी पतीला अटक करण्यात आली आहे.

१३ नोव्हेंबर रोजी पाटीलपाडा येथील पोलिस पाटील संदीप भुरकुड यांनी तलासरी पोलिस ठाण्यात फिर्याद दिली होती. ३० ते ३५ वयोगटातील महिलेचा गळा आवळून खून करण्यात आल्याची माहिती त्यांनी दिली. यावरून गुन्हा दाखल करण्यात आला होता. मृत महिलेची कोणतीही माहिती उपलब्ध नसताना तलासरी पोलिसांनी तिचे फोटो विविध माध्यमांतून प्रसारित केले. तसेच तांत्रिक विश्लेषणाच्या आधारे तिच्या नातेवाइकांचा शोध लावण्यात आला. त्यातून तिची ओळख अफसाना हसरतुल साकेरअली मन्सुरी (वय २५) अशी पटली. तिचा पती साकीरअली मुस्तफाअली मन्सुरी (वय ४३, रा. सावरोली) याला ताब्यात घेतले. पोलिस चौकशीदरम्यान त्याने अनैतिक संबंधांच्या कारणावरून पत्नीचा गळा आवळून खून केल्याची कबुली दिली. याप्रकरणी त्याला अटक करण्यात आल्याचे पोलिस निरीक्षक अजय गोरड यांनी सांगितले.