कत्तलीसाठी गुरे नेणारा पिकअप टेम्पो खालापूरात पकडला

गुरे नेणाऱ्या दोघांना खालापुरात अटक

खालापूर, ता. १८ (बातमीदार) ः गोवंश जातीची १२ गुरे कत्तलीसाठी घेऊन जाणारा टेम्पो सोमवारी रात्री खालापूर पोलिसांनी पकडला. याप्रकरणी मुनाजीर रशीद कुरेशी (वय ४७) आणि वारिस बाबू कुरेशी (वय ४३ दोघे रा. गोवंडी मुंबई) यांना अटक करण्यात आली आहे. सोमवारी रात्री मुंबई पुणे राष्ट्रीय महामार्गावरून बेकायदेशीरपणे गोवंश जातीची गुरे कत्तलीसाठी नेत असल्याची माहिती खालापूर पोलिसांना मिळाली. त्या आधारे पोलिस पथकाने संशयित टेम्पो खालापूर फाटा येथे अडवला. टेम्पोची तपासणी केली असता, त्यामध्ये १० म्हशींचे रेडके व दोन पारडे दाटीवाटीने कोंबून वाहतूक करताना मिळून आले. याप्रकरणी खालापूर पोलिस ठाण्यात गुन्हा दाखल करण्यात आला असून, पुढील तपास सुरू आहे.