हुतात्म्यांना अभिवनादनासाठी विशेष स्मृतिसोहळा

हुतात्म्यांना अभिवादनासाठी आज विशेष स्मृतिसोहळा
नवी मुंबई, ता. १९ (वार्ताहर) : संयुक्त महाराष्ट्र चळवळीतील हुतात्म्यांच्या तेजोमय स्मृतींना अभिवादन करण्यासाठी नवी मुंबईतील मराठी संस्थांनी एकत्र येत एका विशेष स्मृतिसोहळ्याचे आयोजन केले आहे. मराठी साहित्य संस्कृती व कला मंडळ आणि शिव तुतारी प्रतिष्ठान, नवी मुंबई यांच्या संयुक्त विद्यमाने गुरुवारी (ता. २०) सायंकाळी ६.३० वाजता वाशीतील साहित्य मंदिर सभागृहात हा कार्यक्रम पार पडणार आहे. दरवर्षी २१ नोव्हेंबर रोजी पाळल्या जाणाऱ्या हुतात्मादिनाच्या निमित्ताने विविध संस्था व कार्यकर्त्यांना एकत्र आणून हुतात्म्यांच्या कार्याची आठवण जागी करणे आणि त्यांच्या बलिदानाबद्दल कृतज्ञता व्यक्त करणे हा त्यामागील उद्देश आहे.
उपस्थित सर्व संस्थांच्या प्रतिनिधींकडून हुतात्मा दीपप्रज्वलन करून अभिवादन करण्यात येणार आहे. मराठी साहित्य संस्कृती व कला मंडळाचे अध्यक्ष सुभाष कुलकर्णी आणि शिव तुतारी प्रतिष्ठानचे अध्यक्ष प्रा. रवींद्र पाटील यांनी सर्व संस्था व नवी मुंबईकरांना या कार्यक्रमास उपस्थित राहण्याचे आवाहन केले आहे. मराठी संस्कृती, भाषा आणि स्वाभिमानासाठी प्राणार्पण करणाऱ्या हुतात्म्यांच्या स्मृतीला उजाळा देणारा हा समारंभ साहित्यप्रेमी व सांस्कृतिक कार्यकर्त्यांसाठी खास ठरणार आहे.