धारावीत अखंड हरिनाम सप्ताह

धारावीत अखंड हरिनाम सप्ताह
धारावी, ता. १९ (बातमीदार) : धारावीतील खांबदेव नगर येथील श्री विठ्ठल रखुमाई मंदिरात १८ नोव्हेंबर ते २४ नोव्हेंबर या कालावधीत अखंड हरिनाम सप्ताहाचे आयोजन करण्यात आले आहे. ह.भ.प. शिवाजी महाराज जगताप यांच्या नेतृत्वाखाली दामोदर खोपडे अण्णा यांच्या मार्गदर्शनाखाली यंदाचे ५५ वे वर्ष आहे.
नामवंत कीर्तनकारांचे सुश्राव्य कीर्तन तसेच दिवसभर विविध धार्मिक कार्यक्रम असणार आहेत. दरदिवशी पहाटे ४ ते ६ च्या दरम्यान काकड आरती, सकाळी ७ ते ८ सामुदायिक प्रार्थना, सकाळी ८ ते १०.३० सामुदायिक श्री ज्ञानेश्वरी पारायण, ११ ते १२ वाजेपर्यत भजन, दुपारी २ ते ४ श्री ज्ञानेश्वरी पारायण, सायंकाळी ४ ते ५ प्रवचन, ६ ते ७ सामुदायिक हरिपाठ, तर रात्री ९ ते ११ वाजेपर्यंत श्री हरी कीर्तन नंतर जागर होणार आहे. २३ रोजी सायंकाळी ४ वाजता नगर प्रदक्षिणा (दिंडी) सायंकाळी ७ वाजता ज्ञानेश्वरी सांगता आणि दीपोत्सव सोहळा होईल. धारावीतील श्री विठ्ठल रुखमाईचे जुने मंदिर म्हणून प्रसिद्ध असलेल्या मंदिरात भाविकांची रीघ लागते.
२४ नोव्हेंबर रोजी काल्याच्या कीर्तनाने व महाप्रसादाने अखंड हरिनाम सप्ताहाची सांगता होणार आहे. संजय धुमाळ, कैलास चांदोरे, नागेश कांबरे, रवींद्र डोईफोडे, संतोष लिंबोरे, अनिल यादव व सर्व तरुण पिढीने ज्येष्ठांच्या मार्गदर्शनाखाली कार्यक्रमाचे उत्तम नियोजन केले आहे.