जांभूळमाथा शाळेत विद्यार्थ्यांचा छळ; पालक संतापले

जांभूळ माथा शाळेत विद्यार्थ्यांमध्ये शिक्षकाची दहशत
शिक्षकावर तत्काळ कारवाईची पालकांची मागणी

जव्हार, ता. १९ (बातमीदार) ः तालुक्यातील जिल्हा परिषद शाळा जांभूळ माथा येथे एका शिक्षकाने विद्यार्थ्यांवर निर्माण केलेल्या भीतीच्या वातावरणामुळे ग्रामस्थांमध्ये संतापाची लाट पसरली आहे. शिक्षकामुळे विद्यार्थी शाळेऐवजी जंगलात लपून बसल्याची धक्कादायक माहिती उघड झाली आहे. यामुळे पालकांसोबतच येथील उपसरपंच सुभाष भोरे आक्रमक झाले. त्यांनी जव्हार पंचायत समितीच्या गट विकास, तसेच गट शिक्षण अधिकाऱ्यांकडे निवेदन देत कारवाईची मागणी केली आहे.
शुक्रवारी (ता. १४) शिक्षक जाधव यांनी पाच विद्यार्थ्यांना एक किलोमीटर लांब असलेल्या झऱ्यावर पाणी भरायला पाठवले. या विद्यार्थ्यांना पाणी आणण्यास उशीर झाला. यामुळे शिक्षकाने विद्यार्थ्यांना बेदम मारहाण केली. हे चित्र पाहताच उर्वरित विद्यार्थी बचावासाठी जंगलात लपून बसले. ही बाब पंचायत समितीच्या प्रशासकीय विभागाला कळूनही कोणतीही कारवाई झाली नाही.
शाळेत पहिली ते आठवीपर्यंत तुकड्या असून, येथील पटसंख्या ९६ आहे. ढाढरी ग्रामपंचायतीचे उपसरपंच सुभाष भोरे यांनी ग्रामपंचायत कमिटी, पालक आणि विद्यार्थ्यांची संयुक्त बैठक घेतली. संबंधित शिक्षकावर कारवाई न केल्यास आंदोलनाचा इशारा भोरे यांनी दिला आहे.
----
“लोकनाथ जाधव या शिक्षकावर तत्काळ कारवाई नाही केली, तर आम्ही शिक्षण अधिकाऱ्यांच्या कार्यालयावर ठिय्या आंदोलन करू.
शिवाय,“विद्यार्थ्यांवर दहशत माजवणाऱ्या शिक्षकाची तत्काळ बदली करा.”
- सुभाष भोरे, उपसरपंच, ढाढरी ग्रामपंचायत
----
जांभूळ माथा शाळेतील शिक्षकाच्या वर्तुणुकीबाबत समजले आहे. संबंधित विभागाला या प्रकरणाची शहानिशा करून उचित कारवाई करण्याचे निर्देश दिले आहेत.
- मनोज रानडे, मुख्य कार्यकारी अधिकारी, जिल्हा परिषद पालघर