पाणी भरण्याच्या किरकोळ कारणावरून विरार मध्ये एकाची हत्या

पाणी भरण्याच्या कारणावरून विरारमध्ये एकाची हत्या

नालासोपारा, ता. १९ (बातमीदार) ः पाणी भरण्याच्या क्षुल्लक वादातून एका महिलेने आपल्या शेजाऱ्याची मच्छर मारण्याचा स्प्रे तोंडावर फवारून हत्या केली. ही धक्कादायक घटना विरार पश्चिम जेपी नगरमध्ये मंगळवारी (ता. १८) रात्री घडली. याप्रकरणी अर्नाळा सागरी पोलिसांनी महिलेला अटक केली आहे.
उमेश पवार (वय ५७) असे मृत व्यक्तीचे नाव आहे, तर कुंदा उत्तेकर असे अटक केलेल्या महिलेचे नाव आहे. विरार पश्चिमेच्या जेपी नगरमध्ये कुंदा आणि उमेश हे एकाच इमारतीमध्ये राहतात. वर्षापूर्वी इमारतीच्या तिसऱ्या मजल्यावर ते आजूबाजूला राहत होते. तेव्हा किरकोळ कारणावरून त्यांच्यात वाद होते. उमेश यांच्या घरी पाणी नसल्याने ते रात्री पूर्वी राहात असलेल्या रूममध्ये पाणी भरण्यासाठी गेले. तेव्हा त्या दोघांमध्ये पुन्हा वाद झाला. तेव्हा कुंदाने चक्क मच्छर मारण्याचा स्प्रे उमेश यांच्या तोंडावर मारला. त्यात जखमी होऊन उपचारादरम्यान त्यांचा मृत्यू झाला. किरकोळ कारणावरून व्यक्तीचा जीव गेल्याने कुंदाविरोधात तीव्र संताप व्यक्त होत आहे.