सान्वी पाटील हिचा ४,२०० किलोमीटरचा प्रेरणादायक प्रवास

सान्वी पाटीलचा ४,२०० किलोमीटरचा प्रेरणादायक प्रवास
मुंबई, ता. २० ः एल. के. हायस्कूल, चुनाभट्टी येथील इयत्ता सहावीची विद्यार्थिनी सान्वी पाटील हिने आपल्या वडिलांसोबत सायकलवरून गेटवे ऑफ इंडिया, मुंबई ते काश्मीर असा तब्बल ४,२०० किलोमीटरचा प्रेरणादायक प्रवास नुकताच यशस्वीपणे पूर्ण केला आहे. सान्वीच्या या अविस्मरणीय आणि विक्रमी कामगिरीबद्दल तिचे शाळेत उत्साहाने स्वागत करण्यात आले. संस्थेच्या अध्यक्षा प्रमिला गोस्वामी, सचिव प्रणिता भारती, मुख्याध्यापक विश्वास निकुंभ, शिक्षक आणि विद्यार्थ्यांनी ढोल-ताशांच्या गजरात सान्वीचे अभिनंदन केले.
सान्वीने या प्रवासात शारीरिक कष्ट, जिद्द आणि चिकाटी दाखवत विविध राज्यांची संस्कृती, नैसर्गिक सौंदर्य आणि सामाजिक परिस्थितीचा अनुभव घेतला. तिच्या या उल्लेखनीय यशामुळे शाळेचे आणि मुंबई शहराचे नाव उंचावले आहे. सान्वीच्या या कामगिरीमुळे इतर विद्यार्थ्यांनाही मोठी स्वप्ने पाहण्याची आणि ती पूर्ण करण्याची प्रेरणा मिळेल, असा विश्वास शाळेच्या प्रशासनाने केला आहे. या विक्रमाची नोंद लवकरच इंडिया बुक ऑफ रेकॉर्ड्समध्ये होणार आहे.