कामोठा महोत्सवात अध्यात्माचे रंग,

कामोठे महोत्सवात अध्यात्माचे रंग
‘बिग बॉस’ फेम पुरुषोत्तम पाटील यांच्या सुश्राव्य कीर्तनाने रसिक मंत्रमुग्ध
कामोठे, ता. २० (बातमीदार) : आगरी-कराडी कामोठ्याच्या १४ व्या महोत्सवाच्या सहाव्या दिवशी, रविवारी (ता. १६) सायंकाळी ‘बिग बॉस’ फेम कीर्तनकार पुरुषोत्तम पाटील यांच्या सुश्राव्य कीर्तन सोहळ्याने कामोठा महोत्सवात अध्यात्म आणि भक्तिभावाचा अनोखा संगम साधला. पाटील यांच्या प्रभावी, विचारप्रवर्तक मांडणी आणि भक्तिपूर्ण गायनाने उपस्थित शेकडो नागरिक मंत्रमुग्ध झाले.
त्यांनी पारंपरिक कीर्तनातून सामाजिक जागरूकता, जीवनमूल्ये आणि भक्तिभाव यांची सांगड घालत उपस्थितांना अंतर्मुख केले. कामोठ्यातील हा महोत्सव वर्षानुवर्षे नागरिकांना एकत्र आणत आहे. कीर्तन, भजने, सांस्कृतिक कार्यक्रम आणि सामाजिक उपक्रम यांच्या माध्यमातून हा महोत्सव लोकांमध्ये आनंदाचे आणि अध्यात्माचे वातावरण निर्माण करत आहे. पुरुषोत्तम पाटील यांच्या प्रभावी कीर्तनाने यावर्षीचे सत्र अधिक संस्मरणीय बनवले असून, नागरिकांनी अशा भक्तिमय कार्यक्रमांची सातत्याने अपेक्षा व्यक्त केली.
कामोठे महोत्सवाचे आयोजन अशोक पावणेकर, जगदीश पावणेकर, विशाल पावणेकर, विशाल बेलकर, सुमीत गोवारी, अमोल कड, प्रशांत कुंभार, सोहन मुकादम, तुषार हिरवे आणि राकेश बारसकर यांच्या संयुक्त प्रयत्नातून यशस्वी झाले. प्रमुख पाहुणे पोपट आवारी यांची या वेळी उपस्थिती होती.

कार्यक्रम प्रेरणादायक
हा महोत्सव समाजाला एकत्र आणणारी आणि आध्यात्मिक मूल्यांतून प्रेरणा देणारी पर्वणी आहे. हा भक्तिमय कार्यक्रम परिसरातील तरुण पिढीला संस्कृतीशी जोडून ठेवण्यास प्रेरणा देणारा ठरला, असे मत आयोजक जय पावणेकर यांनी व्यक्त केले.