घाटकोपरमध्ये वृद्धाची हत्या

घाटकोपरमध्ये वृद्धाची हत्या

घाटकोपर, ता. २१ (बातमीदार) ः पश्चिमेकडील सीजीएस कॉलनीत एका अनोळखी तरुणाच्या हल्ल्यात सुरेंद्र पाचडकर या वृद्धाचा मृत्यू झाला. ही घटना गुरुवारी (ता. २०) मध्यरात्री घडली असून, हा हल्ला या भागातील गर्दुल्ल्यांनी केला असावा, असा संशय व्यक्त केला जात आहे.
घाटकोपर पोलिसांनी याबाबत अपघाती मृत्यूची नोंद केली आहे. पोलिस आरोपींच्या मागावर आहेत. अद्याप कोणालाही अटक केली नसून, लवकरच आरोपी जेरबंद होतील, अशी माहिती परिमंडळ सातचे पोलिस उपायुक्त राकेश ओला यांनी दिली. सुरेंद्र पाचडकर हे आजारपणामुळे रोज या भागातून पायी चालतात. गुरुवारीही ते तेथून जात असताना एका तरुणाने त्यांच्या डोक्यावर स्टीलच्या रॉडने हल्ला केला. जखमी अवस्थेत त्यांना रुग्णालयात दाखल करण्यात आले होते. एका महिलेने पोलिसांना ही माहिती दिली आणि आरोपींना मी ओळखू शकते, असे सांगितले आहे. सुरेंद्र यांचा मृतदेह सध्या राजावाडी रुग्णालयात शवविच्छेदनासाठी पाठवण्यात आला आहे. सुरेंद्र हे रेल्वेमध्ये लोको पायलट म्हणून काम केल्यानंतर निवृत्त झाले आहेत.