अंबरनाथमध्ये ५९ जागांसाठी २७९ उमेदवार

अंबरनाथमध्ये ५९ जागांसाठी २७९ उमेदवार रिंगणात
अंबरनाथ, ता. २१ (वार्ताहर) ः नगरपालिकेच्या निवडणुकीतून ६४ जणांनी माघार घेतली असून, आता २७९ उमेदवार रिंगणात आहेत. २९ प्रभागांमधील एकूण ५९ जागांसाठी ही निवडणूक होत आहे. तर नगराध्यक्षपदासाठी कोणीही माघार घेतली नाही. त्यामुळे या पदासाठी आता ११ उमेदवारांमध्ये लढत होणार आहे.
माघार घेणाऱ्यांमध्ये पक्षीय उमेदवारांचाही समावेश आहे. भाजपच्या प्रभाग १७-बी मधील राजेंद्र कुलकर्णी व प्रभाग २४-बी मधील स्वप्नाली माहुरकर यांनी अर्ज मागे घेतला. प्रहार जनशक्ती पक्षाचे दत्तात्रय घोगरे (प्रभाग २-बी) यांनीही माघार घेतली. शिवसेना (उद्धव ठाकरे) पक्षाचे अरबाज कुरेशी (प्रभाग १५-बी) आणि संघजा मेश्राम (प्रभाग १८-ए) यांनी अर्ज मागे घेतला. काँग्रेसच्या रूपाली तायडे (प्रभाग १८-बी) यांनीही माघार घेतल्याचे कळते.