जव्हार नगर परिषद प्रचाराचा धुराळा

जव्हार, ता. २२ (बातमीदार) : नगर परिषदेसाठी मतदान आता काही दिवसांवर येऊन ठेपले आहे. दरम्यान, ही निवडणूक सर्वच राजकीय पक्ष आपापल्या संघटनेच्या प्रबळ अशा स्टार प्रचारकांद्वारे मतदारांना आकर्षित करण्याचे नियोजन करीत आहे. शनिवारी (ता. २२) दुपारी १२ वाजता उपमुख्यमंत्री तथा शिवसेनेचे प्रमुख नेते एकनाथ शिंदे यांनी जव्हार नगर परिषद निवडणुकीत राष्ट्रवादी अजित पवार आणि शिंदे गटातील सर्वच उमेदवारांसाठी प्रचार केला. त्यांच्या या पालघर जिल्हा दौऱ्यादरम्यान जव्हार नगर परिषदेचा धुरळा उडाल्याचे चित्र पाहायला मिळाले.

जव्हार शहरातील महात्मा गांधी चौक येथे शनिवारी प्रचार सभेचे आयोजन करण्यात आले होते. या वेळी शिंदे यांच्या मार्गदर्शनात महायुतीची काय भूमिका, महत्त्वाचे मुद्दे असतील हे ऐकण्यासाठी सर्वपक्षीय नेतेमंडळी तथा उमेदवारांनी आपापले हस्तक पाठवून त्यांच्याकडून मागोवा घेतला. जव्हारविषयी माझ्या मनात आत्मियता असून, या संस्थाकालीन जव्हारच्या विकासासाठी आपण सदैव प्रयत्नशील राहिलो आहोत आणि राहणार आहे, असे शिंदे म्हणाले.

शिवसेना शिंदे गट तसेच अजित पवार राष्ट्रवादी गट यांच्या वतीने जव्हार शहरात सर्वच उमेदवार, कार्यकर्ते प्रचार सभेसाठी रवींद्र फाटक, वसंत चव्हाण यांच्यासह मोठ्या संख्येने उपस्थित होते. मुख्यमंत्री लाडकी बहीण योजना शिंदे यांनी अमलात आणल्यापासून आदिवासी भागातील महिलांना मोठा आधार निर्माण झाल्याचे महिला बोलत आहेत. शिवाय एसटी प्रवासात अर्धे तिकीट, ७५ वर्षांवरील नागरिकांना मोफत प्रवास ही योजनादेखील हिताची असल्याचे उपस्थित महिलांनी सांगितले. त्यामुळे पुन्हा एकदा लाडक्या बहिणी सत्तेत परिवर्तन करतील काय, हे पाहाणे औत्सुक्याचे ठरणार आहे.