रस्त्यावर कचरा टाकणाऱ्यांवर महापालिकेची दंडात्मक कारवाई

रस्त्यावर कचरा टाकणाऱ्यांवर महापालिकेची दंडात्मक कारवाई
कल्याण, ता.२५ (बातमीदार) : रस्त्यावर किंवा सार्वजनिक ठिकाणी कचरा टाकणाऱ्या बेशिस्त नागरिकांवर कल्याण-डोंबिवली महानगरपालिकेने आता दंडात्मक मोहिम हाती घेतली आहे. महापालिकेच्या स्वच्छता विभागाने तपासादरम्यान नियमभंग करणाऱ्यांवर प्रत्येकी तीन हजार रुपयांचा दंड आकारण्यास सुरुवात केली आहे. महापालिकेकडून नियमित कचरा गाडीतच कचरा टाकावा, असे आवाहन नागरिकांना केले आहे. रस्त्यांवर, नालेकिनारी किंवा सार्वजनिक ठिकाणी कचरा टाकल्यास कठोर कारवाई करण्यात येईल, असा इशाराही प्रशासनाने दिला आहे. स्वच्छता टिकवण्यासाठी ही मोहीम पुढील काही दिवसांत संपूर्ण महापालिका क्षेत्रात राबवली जात असल्याची माहिती आहे. या कारवाईमुळे अस्वच्छता पसरवणाऱ्या बेशिस्त नागरिकांना चांगलाच धडा मिळणार आहे.