पारंपरिक पद्धतीनेच भातमळणी

विक्रमगड, ता. २ (बातमीदार) : तालुक्यातील बहुतेक ठिकाणी कापणीची कामे आटोपली आहेत व आता शेतावरील खळ्यांत भातझोडणी अंतिम टप्प्यात आहे. ग्रामीण भागात पारंपरिकता जपून झोडपणी-मळणीची कामे केली जात आहेत.

विक्रमगडसारख्या ग्रामीण भागात मुखत्वे आदिवासीवाड्या-वस्त्यांमध्ये रूढी-परंपरा जपली जात आहे. मळणीची कामे जुन्या साहित्यानुसार केली जात आहेत. तालुक्यातील भातकापणीचा काळ जवळपास संपत आला असून, शेतामध्ये असलेल्या खळ्यावर भात साठविले जाते आहे. त्यानुसार भाताच्या मळणीची कामे सुरू झाली आहेत. दिवस मावळतीला जाताच खळ्यांमधून हैक.... हैक..... हुर्र.... अशा आरोळ्या ऐकू येऊ लागल्या आहेत.

सामूहिक मळणी काळाच्या ओघात लोप
झोडणी कामाच्या वेळी गावठी कोंबड्यांचा झणझणीत रस्सा, नव्या तांदळाच्या भाकरीसोबत असणारी मळणी म्हणजे आवाटातील बालकापासून ते वयोवृद्धापर्यंत विशेष मेजवानी असते. सामूहिक पद्धतीने काढली जाणारी ही मळणी काळाच्या ओघात लोप पावत चालली असली तरी परिसरात त्याच परंपरेनुसार केली जात आहे, असे शेतकरी अनिल गोविंद यांनी सांगितले.