वसई तालुक्यात पहिल्यांदाच ग्रंथालीचा वाचक दिन

वसई तालुक्यात पहिल्यांदाच ग्रंथालीचा वाचकदिन
विरार, ता. ४ (बातमीदार) : ग्रंथाली वाचक चळवळीचा ५१वा वाचकदिन वसई तालुक्यात बुधवारी (ता. १०) आणि गुरुवारी (ता. ११) साजरा होणार आहे. समाजोन्नती मंडळ माणिकपूर आणि ग्रंथाली यांच्या संयुक्त विद्यमाने समाजोन्नती मंडळाच्या सभागृहात सायंकाळी ५ वाजता सुप्रसिद्ध लेखिका वीणा गवाणकर या अपर्णा पाडगावकर, मंगेश सातपुते आणि मकरंद सावंत या तरुण लेखक दिग्दर्शकांशी मनमोकळा संवाद साधतील.
विवा महाविद्यालय, कोकण मराठी साहित्य परिषद विरार शाखा आणि ग्रंथाली यांच्या संयुक्त विद्यमाने गुरुवारी सकाळी ११ वाजता पद्मश्रीप्राप्त सुलेखनकार अच्युत पालव यांच्या मुलाखतीचे आयोजन नवीन विवा महाविद्यालयातील सेमिनार हॉलमध्ये करण्यात आले आहे. कोकण मराठी साहित्य परिषदेच्या केंद्रीय अध्यक्ष नमिता कीर कार्यक्रमाच्या अध्यक्षस्थानी असून कोकण मराठी साहित्य परिषदेचे (कोमसाप) जिल्हाध्यक्ष प्रवीण दवणे विशेष अतिथी म्हणून उपस्थित राहणार आहेत. दोन्ही कार्यक्रम विनामूल्य असून सर्वांसाठी खुले असून रसिकांनी कार्यक्रमास उपस्थित राहावे, असे आवाहन कोमसाप विरार शाखेचे अध्यक्ष अजीव पाटील आणि समाजोन्नती मंडळाचे अध्यक्ष सुरेंद्र वनमाळी यांनी केले आहे.