पालिकेने खोदलेला रस्ता नागरिकांची अडचण

फोटो आहे
खोदलेल्या रस्त्यामुळे वाहनचालक अडचणीत
जुईनगर, ता. ४ (बातमीदार) : जुईनगर परिसरातील सेक्टर २३ मधील रेल्वे कॉलनीमागील रस्ता पालिकेने पाण्याच्या पाइपलाइनसाठी खोदला असल्याचे सांगण्यात येत आहे. महिना होऊन गेला तरी तेथील रस्त्याची दुरस्ती न झाल्यामुळे नागरिकांकडून नाराजी व्यक्त केली जात आहे.
जुईनगर सेक्टर २३ मधील रेल्वे कॉलनी आणि सेक्टर २५ मधील भारत सोसायटीच्या कोपऱ्यावरील तसेच स्वामी समर्थ मठाकडे जात असलेल्या रस्त्याच्या दुरवस्थेमुळे येथे वाहनचालकांनादेखील कसरत करावी लागत आहे. या रस्त्यावरून शालेय विद्यार्थी, पालक, स्वामीभक्त नियमित ये-जा करतात. शिवाय येथील वळणावरचा रस्ता खराब असल्याने वाहनांना वळण घेताना अपघाताची भीती व्यक्त केली जात आहे. त्यामुळे लवकरात लवकर हा रस्ता दुरुस्त करण्याची मागणी स्थानिक नागरिक करत आहेत. हा रस्ता सुस्थितीत असताना खोदण्याची गरजच काय, असा सवालही नागरिकांकडून विचारला जात आहे.