गुरु नानक महाविद्यालयाची महामानव डॉ. बाबासाहेब आंबेडकर यांना ६९ तास अभ्यास करून अभिवादन

डॉ. बाबासाहेब आंबेडकरांना गुरू नानक महाविद्यालयाचे ६९ तास अभ्यास करून अभिवादन
धारावी, ता. ४ (बातमीदार) : सायन-कोळीवाडा येथील गुरू नानक महाविद्यालयाच्या संविधान क्लब आणि राज्यशास्त्र विभागातर्फे महामानव डॉ. बाबासाहेब आंबेडकर यांच्या ६९व्या महापरिनिर्वाण दिनानिमित्त ६९ तास अभ्यासक्रम हा उपक्रम राबवत आहे. उपक्रमाची सुरुवात महात्मा फुले यांच्या पुण्यतिथीदिनी (ता. २८) करण्यात आली. विद्यार्थी दररोज सकाळी ७.३० ते सायंकाळी ५.३० वाजेपर्यंत अभ्यास करून बाबासाहेबांना आदरांजली वाहत आहेत.
या उपक्रमात महापुरुषांच्या विचारावर चर्चासत्र आयोजित घेण्यात आले. बाबासाहेबांनी लिहिलेल्या पुस्तकांचे प्रदर्शन भरवण्यात आले. या कार्यक्रमाची सांगता ६ डिसेंबरला चैत्यभूमी येथे भेट देऊन करण्यात येणार आहे. महाविद्यालयाच्या प्राचार्या डॉ. पुष्पिंदर कौर भाटिया यांच्या मार्गदर्शनाखाली आणि राज्यशास्त्र विभागप्रमुख प्रा. सुमित खरात यांच्या नेतृत्वात या उपक्रमाचे आयोजन करण्यात आले आहे.