बीभत्स हावभावांना लगाम

बीभत्स हावभावांना लगाम
महामार्गावरील १० तृतीयपंथीवर कारवाई
पनवेल, ता.४(वार्ताहर): महामार्गावर रात्री-अपरात्री तोकडे कपडे परिधान बीभत्स हावभाव करणाऱ्या १० तृतीयपंथीयांना अनैतिक मानवी वाहतूक प्रतिबंधक कक्षाने कारवाई करुन ताब्यात घेतले आहे. या प्रकरणात सीबीडी, कळंबोली पोलिस ठाण्यामध्ये गुन्हे दाखल आहेत.
उरण फाटा सेवा रस्ता, कंळबोली स्टील मार्केट रोड येथे काही तृतीयपंथी रस्त्यावर तोकडे कपडे परिधान करुन हातवारे, बीभत्स हावभाव, अश्लील चाळे करत असल्याची माहिती अनैतिक मानवी वाहतूक प्रतिबंध कक्षाला मिळाली होती. त्याअनुषंगाने गुन्हे शाखेचे सहाय्यक पोलिस आयुक्त धर्मपाल बनसोडे यांच्या मार्गदर्शनाखाली अनैतिक मानवी वाहतूक प्रतिबंधक कक्षातील अधिकारी, अंमलदारांच्या दोन टिम तयार करण्यात आल्या होत्या. त्यानंतर वरिष्ठ पोलिस निरीक्षक पृथ्वीराज घोरपडे, सहाय्यक पोलिस निरीक्षक राजश्री शिंदे, पोलिस उपनिरीक्षक सरिता गुडे पथकाने २ डिसेंबर रोजी मध्यरात्री उरण फाटा सेवा रस्ता, कंळबोली स्टील मार्केट रोड येथे पाळत ठेवली होती. यावेळी बीभत्स हावभाव केल्याने कारवाई केली.