अल्पवयीन मुलांना गुरांच्या इंजेक्शनची सुई टोचली

अल्पवयीन मुलांना गुरांची सुई टोचली
उल्हासनगर, ता. ४ (वार्ताहर) ः रागाच्या भरात एका व्यक्तीने दोन अल्पवयीन मुलांना गुरांसाठी वापरण्यात येणाऱ्या इंजेक्शनची सुई (निडल) टोचल्याचे समोर आले आहे. या घटनेमुळे परिसरात तीव्र संतापाची लाट उसळली आहे. मुलांना घाबरवून हाकलून लावण्यासाठी हे कृत्य करण्यात आले. याप्रकरणी गुन्हा दाखल करण्यात आला आहे.
मिळालेल्या माहितीनुसार, बुधवारी (ता. ३) रात्री म्हाळगी चौक परिसरात ही घटना घडली. या ठिकाणी दोन अल्पवयीन मुले रस्त्यावर उभे होते. अज्ञात कारणावरून संतापलेल्या कन्हैया कुंजबिहारी यादव ऊर्फ शिवा याने आपल्या हातात असलेल्या गुरांसाठी वापरण्यात येणाऱ्या इंजेक्शनची सुई (निडल) या दोन्ही मुलांच्या कमरेखाली मारली. अचानक झालेल्या या हल्ल्याने मुले घाबरली. त्यांना तत्काळ आरोग्य तपासणीसाठी नेण्यात आले. मुकेश गुप्ता यांच्या तक्रारीनुसार पोलिसांनी कन्हैया कुंजबिहारी यादव ऊर्फ शिवा याच्यावर गुन्हा दाखल केला आहे. या प्रकरणाचा तपास महिला पोलिस उपनिरीक्षक निकिता भोईगड यांच्या मार्गदर्शनाखाली सुरू आहे.