किरकोळ वादातून शेजाऱ्यांमध्ये राडा

भिवंडी, ता. ४ (वार्ताहर) : पतंग कापल्याच्या किरकोळ वादातून शेजाऱ्यांमध्ये जोरदार राडा झाल्याची घटना नवी वस्तीतील नेहरू नगर परिसरात नुकतीच घडली. या प्रकरणात १६ वर्षीय मुलासह दोन महिलांनी एकत्र येत शेजाऱ्यांच्या कुटुंबातील मुलगा, मुलगी, आजी आणि मामीला शिवीगाळ करून मारहाण केल्याचा आरोप आहे. पोलिसांनी या तिघांविरोधात गुन्हा नोंदवला आहे.
तनवीर शहाबुद्दीन अन्सारी (१६), अकिलाबानो (४२) आणि शकीलाबानो (४५) अशी गुन्हा दाखल झालेल्यांची नावे आहेत. या मारहाणीमध्ये जखमी झालेल्या मुलीचे नाव आलिया आहे. पोलिसांनी दिलेल्या माहितीनुसार, फिर्यादी कुटुंब आणि आरोपी हे दोघेही नेहरूनगर येथील यादगार चौकाजवळच्या अशरफीया मदरसा परिसरात शेजारी राहतात. फिर्यादींचा मुलगा रेहान आणि मुलगी आलिया घरासमोर उभे असताना तनवीरने रेहानला ‘माझी पतंग का कापली?’ असा प्रश्न विचारला. रेहानने ‘मला माहीत नाही’ असे सांगताच तनवीरने संतापून त्याला मारहाण केली. दरम्यान, भांडण सोडवण्यासाठी आलेल्या आलियाच्या डोक्यात पाण्याच्या मडक्याने मारून तिलाही जखमी करण्यात आले. मध्यस्थी करण्यासाठी आलेल्या रेहानच्या आजी आणि मामीलाही तिघांनी शिवीगाळ करत मारहाण केली. या प्रकारानंतर रेहानच्या आईने शहर पोलिस ठाण्यात तक्रार दाखल केली असून तिघांविरुद्ध गुन्हा नोंदवला आहे.