म्हाडाच्या पुण्यातील घरांना मोठा प्रतिसाद

म्हाडाच्या पुण्यातील घरांना मोठा प्रतिसाद

सकाळ वृत्तसेवा
मुंबई, ता. ५ : म्हाडाच्या कोकण मंडळाच्या घरांनंतर आता म्हाडाच्या पुण्यातील घरांना अर्जदारांची मोठी पसंती मिळाली आहे. पुण्यातील ४,१८६ घरांसाठी म्हाडाने जाहीर केलेल्या सोडतीसाठी तब्बल दोन लाख १५ हजार ८४७ अर्ज अनामत रकमेसह प्राप्त झाले आहेत.
घरांच्या किमती गगनाला भिडल्या असल्याने सर्वसामान्यांकडून आपले घराचे स्वप्न पूर्ण करण्यासाठी म्हाडाच्या घराला पसंती दिली जात आहे. त्यानुसार म्हाडाच्या कोकण मंडळाने काढलेल्या लाॅटरीसाठी तब्बल एक लाख ५८ हजार अर्ज आले होते. तो रेकाॅर्ड पुणे मंडळाने मोडला असून पुणे, पिंपरी-चिंचवड, पीएमआरडीए तसेच सोलापूर, कोल्हापूर आणि सांगली जिल्ह्यातील विविध गृहनिर्माण योजनेतील ४,१८६ सदनिकांच्या विक्रीकरिता संगणकीय सोडती जाहीर केली आहे. या सोडतीसाठी रेकाॅर्डब्रेक अर्ज प्राप्त झाले आहेत. सोडतीची तारीख लवकरच म्हाडाच्या संकेतस्थळावर जाहीर करण्यात येणार आहे.