बेकायदा फलकबाजीवर पालिकेचे मौन

बेकायदा फलकबाजीवर पालिकेचे मौन
पनवेल, ता. ६ (बातमीदार)ः शहरासह वसाहतीमधून रस्त्यावरील खांब, बसथांबे, चौक, मुख्य रस्ते येथे बेकायदा जाहिरात खुलेआम झळकत असतानाही पालिकेकडून ठोस कारवाई होताना दिसत नाही. मात्र, छोट्याशा व्यावसायिक बॅनरवर कारवाई करून त्यांच्याकडून दंड वसूल करण्यत येतो यामुळे पालिकेच्या कारवाईबाबत प्रश्नचिन्ह निर्माण झाले आहे.
गणेश उत्सव, नवरात्रोत्सवासह सामाजिक कार्यकर्ते, राजकीय पुढाऱ्यांच्या वाढदिवसाच्या बॅनरवर आजतागायत कुठल्याही प्रकारची कारवाई झालेली नाही. पनवेल पालिका दप्तरी तसे नमूद नसल्याने सर्वोच्च न्यायालयाच्या आदेशाचा अवमान होत असून पनवेल पालिकेचे उत्पन्न बुडत आहे. पनवेल शहर वसाहतीमधून रस्त्यावर बांधकाम जाहिराती, दत्त जयंती, अॅकॅडमी, रुग्णालये तसेच प्लॉट विक्री झळकत आहेत. या फलकांमुळे वाहतुकीस अडथळा ठरत असून शहराच्या सौंदर्यावरही बाधा ठरत आहेत. त्यामुळे अतिक्रमण विभागाने ठोस कारवाई करण्याची मागणी केली आहे.