कल्याण पोलीसांच्या ताफ्यात दाखल झाली अत्याधुनिक फॉरेन्सिक व्हॅन

कल्याण पोलिसांच्या ताफ्यात अत्याधुनिक फॉरेन्सिक व्हॅन
कल्याण, ता. ७ (वार्ताहर) ः कल्याण पोलिसांच्या ताफ्यात अत्याधुनिक फॉरेन्सिक व्हॅन दाखल झाली आहे. या व्हॅनमुळे कल्याण परिसरातील गुन्हे तपास आणि प्रकटीकरण प्रक्रियेला अधिक वेग आणि वैज्ञानिक संरक्षण प्राप्त होणार आहे. कल्याण पोलिसांच्या परिमंडळ तीनअंतर्गत महात्मा फुले चौक, बाजारपेठ, कोळसेवाडी, खडकपाडा, डोंबिवली, विष्णुनगर, मानपाडा आणि टिळकनगर असे एकूण आठ पोलिस ठाणे येतात. या पोलिस ठाण्यांच्या हद्दीतील गुन्हेगारी घटनांची तत्काळ तपासणी करण्यासाठी ही व्हॅन कार्यरत राहणार आहे.
या फॉरेन्सिक व्हॅनमध्ये सहाय्यक रासायनिक विश्लेषक, वैज्ञानिक सहाय्यक आणि प्रशिक्षित प्रयोगशाळा तज्ज्ञ उपलब्ध असून घटनास्थळी मिळालेल्या पुराव्यांचे भौतिक, रासायनिक, जैविक आणि डिजिटल विश्लेषण, उच्च प्रतीच्या फॉरेन्सिक उपकरणांच्या सहाय्याने करणे सोयीस्कर होणार आहे. त्यासोबतच घटनास्थळ तपासणी किट्स, नमुना संकलन साधने आणि अत्याधुनिक वैज्ञानिक सामग्रीमुळे प्राथमिक अहवाल तयार करण्याची प्रक्रियाही अधिक वेगवान होणार असल्याची माहिती पोलिस उपायुक्त अतुल झेंडे यांनी दिली.