भिवंडी ग्रामीणमध्ये २१ लाखांचा गुटखा ट्रकसह जप्त

भिवंडी, ता. ६ (वार्ताहर) : गुजरात येथून भिवंडीमार्गे मोठ्या प्रमाणावर गुटखा वाहतूक करून विक्रीसाठी आणला जातो. अशाच पद्धतीने टाकी केल्या जाणाऱ्या गुटख्यावर अन्न व औषध प्रशासनाने कारवाई केली. यामध्ये २१ लाख १५ हजार २५० रुपयांचा बनारसी आशिक सुगंधी सुपारी व बनारसी आशिक सुगंधी तंबाखू साठा जप्त करण्यात आला. तसेच, १० लाख रुपये किमतीचा टेम्पो ताब्यात घेतला. टेम्पोचालक तालीब साबित अली खान यांनी आपल्या टेम्पोमध्ये गुटखा विक्रीसाठी आणल्याची माहिती अन्न व औषध प्रशासनाला मिळाली होती. त्यानुसार पथकाने मुंबई-नाशिक महामार्गावरील भिवंडी-ठाणे बायपास रस्त्यावरील सोनाळे येथील सत्यम ऑटो पेट्रोल पंपजवळील पे अँड पार्क येथे २ डिसेंबरला सकाळी ११.३० वाजताच्या सुमारास सापळा रचत कारवाई केली. संशयित टेम्पोची तपासणी केल्यावर गुटखा आणि सुगंधी तंबाखूचा साठा आढळून आला. अन्न व औषध विभागातील अधिकारी अरविंद वसंत कांडेलकर यांनी दिलेल्या तक्रारीनंतर भिवंडी तालुका पोलिस ठाण्यात गुन्हा नोंद करून टेम्पोचालकाला ताब्यात घेतले आहे.