पोक्सो गुन्ह्यात तरुणाला २० वर्ष सक्त मजुरी

पोक्सो गुन्ह्यात तरुणाला २० वर्षे सक्त मजुरी
ठाणे शहर, ता. ६ (बातमीदार) : अल्पवयीन मुलीवर लैंगिक अत्याचार करणाऱ्याला ठाणे जिल्हा पोक्सो न्यायालयाने २० वर्षांची सक्त मजुरी आणि ५० हजार रुपये दंडाची शिक्षा सुनावली आहे. चार वर्षांपूर्वी काशीमिरा पोलिस ठाण्याच्या हद्दीत हा गुन्हा घडला होता.
काशी गावात राहणारी पीडित १३ वर्षीय मुलगी कंपनीत आईला जेवणाचा डबा देऊन घरी येत होती. तिच्या आईशी ओळखी असलेला शाहीद मोहम्मद रमजान हास्मी (वय ३०) याने तिला घरी बोलावले आणि तिच्यावर लैंगिक अत्याचार केला. याची माहिती कोणाला देऊन नकोस, अशी धमकीही दिली. त्यामुळे घाबरून मुलीनेही याबाबत घरी सांगितले नाही. पोटात दुखू लागल्याने तिला (ता. ३ ऑगस्ट २०२१) रुग्णालयात नेले असता तपासणीत ती गर्भावती असल्याचे समजले. त्यानंतर तिला विश्वासात घेऊन विचारले असता तिने घडलेला प्रसंग आईला सांगितला. त्यानंतर काशीमिरा पोलिस ठाण्यात हास्मीविरोधात लैंगिक अत्याचार आणि पोक्सोचा गुन्हा दाखल करण्यात आला. या गुन्ह्याची अंतिम सुनावणी शुक्रवारी (ता. ५) ठाणे जिल्हा सत्र न्यायालयाचे विशेष पोक्सो न्यायाधीश डी. एस. देशमुख यांच्यासमोर झाली. पोक्सो न्यायालयाच्या विशेष सरकारी वकील रेखा हिवराळे यांनी जोरदार युक्तिवाद करून साक्षी, पुराव्यांच्या आधारे हास्मी याचा गुन्हा सिद्ध केला. त्यावर न्यायालयाने त्याला २० वर्षांच्या सक्त मजुरीसह ५० हजार रुपये दंडाची शिक्षा सुनावली. दंडाची रक्कम पीडितेला भरपाई म्हणून देण्यात यावी, असे आदेशही दिले.