श्रीवर्धन येथील व्यापाऱ्याची बडोद्यात आत्महत्या

श्रीवर्धन येथील व्यापाऱ्याची बडोद्यात आत्महत्या
श्रीवर्धन, ता. ७ (वार्ताहर) ः येथील किराणा व्यापारी नरेश सखाराम चौधरी (वय २८ मूळ गाव राजस्थान) यांच्या अवघ्या सहा महिन्यांच्या प्रेमविवाहानंतर संसारातील सततच्या मानसिक ताणाला कंटाळून बडोद्यात रेल्वेखाली उडी मारून आत्महत्या केली. यामुळे परिसरात हळहळ व्यक्त करण्यात येत आहे.
याबाबत मिळालेल्या माहितीनुसार श्रीवर्धन येथे १० वर्षांपूर्वी नरेश व्यापारासाठी आलेला. त्याचा सहा महिन्यांपूर्वी लक्ष्मी हिच्यासोबत प्रेमविवाह झाला होता. संसार सुखाचा व्हावा ही नरेश याची इच्छा. मात्र त्याच्या पत्नीने व सासरच्या माणसांनी त्याला मानसिक त्रास देण्यास सुरुवात केली. बुधवारी (ता. ३) नरेश यांचे मेहुणे श्रीवर्धन येथे तिच्या बहिणीला भेटायला आले. यानंतर नरेश आणि लक्ष्मी यांना सासू आजारी आहे, तुम्ही दोघेही बडोद्याला चला, असे सांगून घेऊन गेले, मात्र तिथे पोहोचल्यावर वेगळंच घडलं. गुरुवारी (ता. ४) पहाटे जेव्हा नरेश, त्यांची पत्नी आणि मेहुणे बडोदा स्थानकावर उतरले, तेव्हा त्यांच्या मेहुण्याने नरेश याला घेऊन जाण्यास नकार दिला.

रेल्वेखाली उडी घेत संपवलं जीवन
एका जवळच्या हॉटेलच्या खोलीत नरेश याला डांबून ठेवले. नंतर नरेश याने बडोदा येथे ट्रॅकवर येत रेल्वेखाली उडी घेत आत्महत्या केली. यामध्ये नरेश याचा जागीच मृत्यू झाला. अवघ्या सहा महिन्यांतच नरेश यांचा संसार उद्ध्वस्त झाला. या प्रकरणात बडोदा रेल्वे पोलिस ठाण्यात गुन्हा दाखल करण्यात आला असून, पुढील तपास सुरू आहे. आत्महत्या करण्यापूर्वी नरेशने व्हिडिओ काढून तो सामाजिक माध्यमांवर शेअर केला होता असे समजते. या व्हिडिओत पत्नी व सासरची माणसे आपला मानसिक छळ करत असल्याचे त्यांनी म्हटले आहे.