आदिवासी विकास विभाग प्रकल्पस्तरीय क्रीडा महोत्सवाचा उत्साहपूर्ण शुभारंभ

क्रीडा महोत्सवात २,२०० खेळाडूंचा विक्रमी सहभाग
कासा, ता. ९ (बातमीदार) : डहाणू आदिवासी विकास विभागांतर्गत आयोजित प्रकल्पस्तरीय क्रीडा महोत्सवाचा शुभारंभ सोमवारी (ता. ९) शासकीय माध्यमिक व उच्च माध्यमिक आश्रमशाळा, सवणे येथे पार पडला.
या महोत्सवात तब्बल २,२०० खेळाडूंनी (१,२०० मुले आणि १,००० मुली) सहभाग नोंदवला आहे, जो बदलत्या सामाजिक दृष्टिकोनाचा सकारात्मक संदेश देतो. सहाय्यक जिल्हाधिकारी तथा प्रकल्प अधिकारी विशाल खत्री यांच्या मार्गदर्शनाखाली हा महोत्सव होत आहे. स्पर्धा १४, १७ आणि १९ या तीन वयोगटांत ९ ते ११ डिसेंबरदरम्यान रंगणार आहेत.
क्रीडा ही स्पर्धा नसून व्यक्तिमत्त्व घडवणारी संस्कारयात्रा आहे. पराभव हा शेवट नसून नव्या सुरुवातीचे पाऊल आहे, असा प्रोत्साहनपर सल्ला विशाल खत्री यांनी या वेळी दिला. खेळाडूंसाठी निवास, भोजन, आरोग्यसेवा अशा सर्व सुविधांची उत्तम व्यवस्था करण्यात आली आहे. हा महोत्सव आदिवासी मुला-मुलींमध्ये शिस्त, नेतृत्वगुण आणि संघभावना विकसित करण्यासाठी महत्त्वाचा ठरणार आहे. उद्घाटन सोहळ्यास प्रकल्पातील वरिष्ठ अधिकारी, मुख्याध्यापक, क्रीडा शिक्षक उपस्थित होते.