प्रभादेवी स्थानकात लोकल थांब्याची फेररचना

प्रभादेवी स्थानकात लोकल थांब्याची फेररचना

एल्फिन्स्टन पुलाच्या कामांचा परिणाम; गर्दी कमी करण्यासाठी पश्चिम रेल्वेची उपाययोजना

सकाळ वृत्तसेवा
मुंबई, ता. ९ : एल्फिन्स्टन पुलाच्या पुनर्बांधणीमुळे प्रभादेवी रेल्वे स्थानकात वाढणारी गर्दी लक्षात घेऊन पश्चिम रेल्वेने लोकल थांब्याच्या पद्धतीत बदल करण्याचा निर्णय घेतला आहे. दक्षिण दिशेच्या पादचारी पुलावर होणारा ताण कमी करण्यासाठी लोकल गाड्या तीन डबे मागे थांबवण्यात येणार आहेत. त्यामुळे उत्तर दिशेकडील, म्हणजे विरार बाजूकडील पादचारी पुलाचा अधिक वापर होईल, अशी रेल्वे प्रशासनाची अपेक्षा आहे.

‘एमएमआरडीए’मार्फत वरळी-शिवडी कनेक्टरच्या कामासाठी ब्रिटिशकालीन एल्फिन्स्टन पूल पाडून त्या ठिकाणी डबलडेकर पूल उभारला जात आहे. सध्या पाडकाम सुरू असून याच पार्श्वभूमीवर पुलावरील पादचारी मार्ग येत्या आठवड्यात पुन्हा बंद होण्याची शक्यता आहे. याआधी पादचारी मार्ग बंद केल्यानंतर प्रभादेवी स्थानकात प्रचंड गर्दी होऊन चेंगराचेंगरीसदृश स्थिती निर्माण झाली होती. त्यानंतर अवघ्या २४ तासांत पादचारी मार्ग पुन्हा खुला करण्यात आला होता. प्रभादेवी स्थानकातून गर्दीच्या वेळेत दररोज तीन ते साडेतीन लाख प्रवाशांची ये-जा होते. एल्फिन्स्टन पुलावरील पादचारी मार्ग बंद झाल्यामुळे ही संपूर्ण गर्दी थेट स्थानकावर येते. दरम्यान, मध्य आणि पश्चिम रेल्वेला जोडणाऱ्या प्रभादेवी स्थानकात सध्या १२ मीटर आणि सहा मीटर रुंदीचे दोन पादचारी पूल आहेत. यापैकी दक्षिणेकडील पुलावर प्रामुख्याने जास्त गर्दी होते. आगामी काळात पादचारी मार्ग बंद झाल्यास ही गर्दी आणखी वाढण्याची शक्यता लक्षात घेऊन रेल्वे प्रशासनाने अतिरिक्त जिना तसेच सरकते जिने उभारण्याचा प्रस्ताव तयार केला आहे. स्थानिक प्रवाशांकडून बोरिवली स्थानकाच्या धर्तीवर प्रभादेवी स्थानकात डेक उभारण्याचीही मागणी करण्यात येत आहे. गर्दीच्या वाढत्या ताणावर हा पर्याय ठरू शकतो, अशी मते प्रवाशांकडून व्यक्त होत आहेत.