शुक्रवारी धारावी स्कूल्स चेस चॅम्पियनशिप

शुक्रवारी धारावी स्कूल्स चेस चॅम्पियनशिप
३० हून अधिक शाळांतील २०० विद्यार्थी सहभागी होणार
सकाळ वृत्तसेवा
मुंबई, ता. ९ ः आशियातील सर्वाधिक दाटीवाटीच्या वस्त्यांपैकी एक असलेल्या धारावीमध्ये लवकरच बुद्धिमत्ता आणि तरुणाईचा एक प्रेरक संगम पाहायला मिळणार आहे. धारावी स्कूल्स चेस चॅम्पियनशिप २०२५ ही स्पर्धा १२ डिसेंबरला डिस्ट्रिक्ट स्पोर्ट्स क्लब येथे होणार आहे. या स्पर्धेत धारावीतील ३० हून अधिक शाळांमधील २०० हून अधिक विद्यार्थी कनिष्ठ आणि वरिष्ठ गटात बुद्धिबळ स्पर्धेत भाग घेणार आहेत. एनएमडीपीएल आणि अदाणी समूह यांच्या संयुक्त विद्यमाने ही चॅम्पियनशिप घेण्यात आली आहे.
या स्पर्धेच्या माध्यमातून विद्यार्थ्यांच्या बौद्धिक कौशल्यांचा विकास, आत्मविश्वासाची वाढ आणि प्रगतीकेंद्रित दृष्टिकोनाची जडणघडण ही उद्दिष्टे साध्य करण्यासाठी चेस चॅम्पियनशिप स्पर्धा एक महत्त्वपूर्ण पाऊल असल्याचे आयोजनकर्त्यांनी सांगितले आहे.
या कार्यक्रमात आंतरराष्ट्रीय बुद्धिबळपटू आर. प्रज्ञानंद सहभागी होणार आहेत. ते विद्यार्थ्यांसोबत संवाद साधत प्रदर्शनी सामने खेळतील. शिस्त, एकाग्रता, चिकाटी आणि विचारशक्ती यांसारख्या जीवनमूल्यांवर मुलांशी चर्चा करतील. स्पर्धेच्या निमित्ताने विद्यार्थ्यांमध्ये, पालकांमध्ये एक उत्साह आणि एक सकारात्मक वातावरण निर्माण होईल, विद्यार्थ्यांना प्रोत्साहन मिळेल, असे मत आयोजकांनी व्यक्त केले.