नॅशनल पार्कमध्ये अधिकाऱ्यांची दारूपार्टी?

नॅशनल पार्कमध्ये अधिकाऱ्यांची दारू पार्टी?
व्हिडिओ व्हायरल; चौकशीचे आदेश

सकाळ वृत्तसेवा
मुंबई, ता. ९ : बोरिवली येथील संजय गांधी राष्ट्रीय उद्यानात काही वनअधिकाऱ्यांनी मद्यपान केल्याचा दावा करणारा व्हिडिओ समाजमाध्यमांवर व्हायरल झाल्याने उद्यान प्रशासनात खळबळ उडाली आहे. उद्यानाच्या संचालिका अनिता पाटील यांनी या प्रकरणाची गंभीर दखल घेत चौकशीचे आदेश दिले आहेत.
व्हायरल झालेल्या व्हिडिओमध्ये संरक्षण चौकीसारख्या ठिकाणी वनअधिकारी मद्यपान करीत असल्याचा आरोप करण्यात आला आहे. हा व्हिडिओ कोणी रेकॉर्ड केला आणि तो कसा प्रसारित झाला, याचाही शोध घेण्याचे निर्देश प्रशासनाने दिले आहेत. संचालिका अनिता पाटील यांनी निवेदनाद्वारे याबाबतची अधिकृत भूमिका स्पष्ट केली आहे. त्यांनी म्हटले आहे, की व्हिडिओची सत्यता तपासली जाणार असून चुकीचे प्रकार घडत असतील तर ते नक्कीच थांबवले पाहिजेत. तसेच हा व्हिडिओ कोणत्या पार्श्वभूमीवर तयार करण्यात आला, याची माहिती गोळा करण्याचेही प्रयत्न सुरू आहेत, असे त्यांनी नमूद केले. संजय गांधी राष्ट्रीय उद्यान हे मुंबईतील अत्यंत महत्त्वाचे पर्यावरणीय क्षेत्र असल्याने या प्रकरणाची चौकशी तातडीने पूर्ण करून संबंधितांवर आवश्यक ती कारवाई केली जाणार असल्याचेही पाटील यांनी स्पष्ट केले आहे.