पीएमजीपी वसाहत पुनर्विकास;

पीएमजीपी वसाहत पुनर्विकास;
रहिवाशांना दोन लाखांचा कॉर्पस फंड
भविष्यातील खर्चाचे नो टेन्शन
सकाळ वृत्तसेवा
मुंबई, ता. ९ ः जोगेश्वरीच्या पीएमजीपी वसाहतीचा पुनर्विकास म्हाडाच्या माध्यमातून केला जाणार असून त्याबाबतच्या प्रस्तावाला राज्य सरकारने अंतिम मंजुरी दिली आहे. पुनर्विकासाअंतर्गत येथील रहिवाशांना प्रतिसदनिका दोन लाख रुपयांचा कॉर्पस फंड म्हाडाकडून दिला जाणार आहे. त्यामुळे रहिवाशांना मोठा दिलासा मिळणार असून भविष्यातील खर्चाचे टेन्शन असणार नाही.
१९९०च्या दशकात पंतप्रधान अनुदान प्रकल्पांतर्गत जोगेश्वरी पीएमजीपी वसाहत उभारली असून त्यामध्ये चार मजली १७ इमारती आहेत. त्यानुसार ९४२ निवासी व ४२ अनिवासी अशा एकूण ९८४ गाळे आहेत. संरचनात्मक अहवालानुसार या इमारती अत्यंत जीर्णावस्थेत आहेत. त्यामुळे सरकारच्या मंजुरीने या वसाहतीचा पूर्णविकास म्हाडा करणार आहे. त्यासाठी ईपीसी कंत्राटदार म्हणून बी. जी. शिर्के कन्स्ट्रक्शन या कंपनीची निवड करण्यात आली आहे. दरम्यान, येथील ९४२ निवासी सदनिका आणि व्यावसायिक गाळ्यांसाठी दोन लाख रुपयांचा कॉर्पस फंड देण्याची तयारी म्हाडाने दर्शवली असल्याची माहिती म्हाडाच्या एका वरिष्ठ अधिकाऱ्याने दिली.

निवासी सदनिका - ९४२
व्यावसायिक गाळे - ४२
प्रस्तावित कॉर्पस फंड - दोन लाख रुपये