ॲड. गायकवाड यांची आठवलेंसोबत भेट

उल्हासनगर, ता. ११ (बातमीदार) : उल्हासनगरातील ॲड. जय गायकवाड यांनी केंद्रीय सामाजिक न्यायमंत्री रामदास आठवले यांची शीळफाटा येथे भेट घेऊन विविध सामाजिक आणि आंदोलनात्मक विषयांवर सविस्तर चर्चा केली. या भेटीत दोघांमधील जुने राजकीय दिवस आणि संघर्षमय प्रवासाच्या आठवणींना उलगडा मिळाला.
विद्यार्थीदशेत २००६ ते २०१४ दरम्यान जय गायकवाड हे रामदास आठवले यांच्या रिपब्लिकन पक्षात सक्रिय कार्यकर्ते म्हणून काम करत होते. अनेक आंदोलने, रस्त्यावरचे लढे, आणि त्यातून झालेले राजकीय गुन्हे अशा अनुभवातून त्यांनी चळवळीची ताकद ओळखली. मात्र, आठवले यांनी भाजपशी युती केल्यानंतर गायकवाड यांनी पक्षापासून अलिप्त राहणे पसंत केले. दरम्यान, रिपाइं (आठवले गट)चे उल्हासनगर शहराध्यक्ष नाना बागूल यांनी रविवारी आयोजित केलेल्या कार्यकर्ता मेळाव्यासाठी रामदास आठवले उल्हासनगरात येणार असल्याची माहिती मिळताच जय गायकवाड यांनी शीळफाटा येथे त्यांची भेट घेतली. भेटीत आठवले यांनी त्यांच्या कार्याचे कौतुक करत, समाजासाठी तुमचे कार्य सुरू ठेवा, मी नेहमी तुमच्यासोबत आहे, असे आश्वासन दिले. या भेटीत अनेक आठवणींना उजाळा मिळून आंदोलनाच्या पुढील वाटचालीसाठी नव्या ऊर्जा लाभल्याचे ॲड. जय गायकवाड यांनी सांगितले. त्यांच्या म्हणण्यानुसार, ही भेट चळवळीला नवी दिशा देणारी ठरली असून, सामाजिक कार्य अधिक वेगाने आणि प्रभावीपणे राबवण्याची प्रेरणा मिळाली आहे.

उल्हासनगर : ॲड. जय गायकवाड यांनी केंद्रीय मंत्री रामदास आठवले यांची शीळफाटा येथे भेट घेतली.