तुटलेल्या गटारामुळे पदपथ धोकादायक

तुटलेल्या गटारामुळे पदपथ धोकादायक
कामोठे, ता. १० (बातमीदार) : कामोठे शहरातील अनेक पदपथांवरील गटारे तुटलेली, झाकणांशिवाय उघडी पडलेली असल्याने पादचाऱ्यांचे हाल होत आहेत. सेक्टर ५, ६, ७ आणि ८ मध्ये ही समस्या अधिक तीव्र असून, नागरिकांना जीव मुठीत धरून पदपथावरून प्रवास करावा लागत आहे.
अर्धवट उघडी आणि तुटलेल्या अवस्थेतील या गटारांमुळे किरकोळ अपघातांच्या घटना घडत असून, अनेक नागरिक जखमी झाले आहेत. विशेषत: शालेय विद्यार्थी, ज्येष्ठ नागरिक आणि दिव्यांगांना या समस्येचा अधिक त्रास सहन करावा लागत आहे.
परिसरातील नागरिकांकडून पनवेल महानगरपालिकेला वारंवार तक्रारी करण्यात येत असून, गटारांवर सुरक्षित झाकणे बसवण्यासाठी तातडीने सर्वेक्षण करण्याची मागणी होत आहे.
प्रतिक्रिया
‘महानगरपालिका कराच्या रूपाने नागरिकांकडून पैसा गोळा करते; मात्र मूलभूत सुविधांचा अभाव कायम आहे. पदपथांवरील तुटलेली गटारे बदलून नवीन, सुरक्षित गटारे बसवणे अत्यावश्यक आहे,’ -अमोल शितोळे, एकता सामाजिक संस्था, कामोठे-