विठ्ठलवाडी एसटी आगारात रौप्यमहोत्सवी अखंड हरिनाम सप्ताहाचा भक्तिमय सोहळा संपन्न

विठ्ठलवाडी एसटी आगारात हरिनाम सप्ताह उत्साहात
कल्याण, ता.१० (बातमीदार) : विठ्ठलवाडी व कल्याण एसटी आगाराच्या संयुक्त विद्यमाने श्री दत्त मंदिर येथे रौप्यमहोत्सवी अखंड हरिनाम सप्ताह, श्री गुरुचरित्र पारायण सोहळा आणि दत्त जन्मोत्सव मोठ्या भक्तिभावात पार पडला. सप्ताह दरम्यान भाविकांसाठी गुरुचरित्र पारायण, प्रवचन आणि कीर्तन सेवेचे आयोजन करण्यात आले होते. या सोहळ्याची सांगता हभप आनंद जोशी यांच्या काल्याच्या कीर्तनानंतर महाप्रसादाने झाली.
विठ्ठलवाडी एसटी आगारात १९८८ साली दत्तगुरु मंदिराची पायाभरणी झाली असून, २००१ पासून अखंड हरिनाम सप्ताहाची परंपरा सुरु झाली. तेव्हापासून दरवर्षी दत्तजयंतीचा सोहळा म्हणजे आगाराचा प्रमुख उत्सव ठरला आहे. विठ्ठलवाडी व कल्याण आगारातील कर्मचारी आणि विविध सामाजिक कार्यकर्ते उत्साहाने या सप्ताहात सहभाग घेतात. आपल्या दैनंदिन कामकाजातून वेळ काढून कर्मचारी वर्ग भक्तिमय कार्यक्रम यशस्वी करण्यास हातभार लावतात. चार दिवस संपूर्ण आगार परिसर हरिनाम संकीर्तनाने आणि भक्तिभावाने दुमदुमला होता.