पालघर जिल्हा परिषदेतर्फे दिव्यांग मुलांच्या क्रीडा स्पर्धा उत्साहात

पालघरमध्ये दिव्यांग मुलांच्या क्रीडा स्पर्धां उत्साहात
पालघर, ता. १० (बातमीदार) : पालघर जिल्हा परिषदेच्या समाज कल्याण विभागातर्फे दिव्यांग विद्यार्थ्यांसाठी आयोजित केलेल्या क्रीडा स्पर्धा आज आर्यन हायस्कूलच्या मैदानावर मोठ्या उत्साहात पार पडल्या. पालघर जिल्ह्यातील १६ शाळांमधील २३६ दिव्यांग विद्यार्थ्यांनी या स्पर्धांमध्ये सहभाग घेतला.
जिल्हाधिकारी डॉ. इंदूराणी जाखड यांच्या हस्ते क्रीडा ज्योत प्रज्वलित करून या स्पर्धांचे उद्घाटन करण्यात आले. मुख्य कार्यकारी अधिकारी मनोज रानडे यांच्यासह इतर मान्यवर उपस्थित होते. धावणे, पळत येऊन लांब उडी, जागेवरून लांब उडी, गोळाफेक आणि स्पॉट बॉल थ्रो अशा विविध क्रीडा प्रकारांत विद्यार्थ्यांनी कौशल्य दाखवले.
डॉ. इंदूराणी जाखड यांनी जिल्हा परिषद सेस फंडातून राबवलेला हा उपक्रम कौतुकास्पद असल्याचे सांगितले. आपल्या अडचणींवर मात करून मैदानावर उभे राहणे हेच तुमचे खरे यश आहे. ही मुले समाजासाठी प्रेरणादायी ठरतात, असे जाखड यांनी म्हटले.
मुख्य कार्यकारी अधिकारी मनोज रानडे यांनी या स्पर्धांमुळे विद्यार्थ्यांचा आत्मविश्वास वाढतो आणि त्यांची सामाजिक जडणघडण मजबूत होते, असे नमूद केले.
स्पर्धांचे यशस्वी आयोजन जिल्हा समाज कल्याण अधिकारी डॉ. प्रकाश हसनाळकर यांच्या नियोजनाखाली करण्यात आले. यावेळी पूर्वी झालेल्या कर्णबधिर व मूकबधिर विद्यार्थ्यांच्या स्पर्धांचे बक्षीस वितरणही संपन्न झाले.