पालघर जिल्ह्यात हुडहुडी

पालघर जिल्ह्यात हुडहुडी
किमान तापमान ११ ते १४ अंशावर
वाणगाव, ता. ११ (बातमीदार) : मुंबई प्रादेशिक हवामान विभागाच्या अंदाजानुसार पुढील तीन दिवस किमान तापमानात सरासरी तीन ते पाच अंशाने घट होणार आहे. त्यामुळे विक्रमगड, जव्हार, वाडा, मोखाडा तालुक्यातील किमान तापमान ११ ते १४ अंश सेल्सियसवर राहण्याची शक्यता आहे.
पालघर, डहाणू, वसई, तलासरी तालुक्यात १३ ते १६ अंश सेल्सियस किमान तापमान राहण्याचा अंदाज आहे. या तालुक्यामध्ये कमी थंडी राहील. आकाश स्वच्छ तसेच वाऱ्याची गती सात ते नऊ किमी प्रतितास राहण्याचा अंदाज असल्याची जिल्हा कृषी हवामान केंद्र, ग्रामीण कृषी मौसम सेवा, कृषी विज्ञान केंद्र, कोसबाड हिल, पालघर येथील कृषी हवामानतज्ज्ञ रिझवाना सय्यद यांनी दिली आहे. तापमानात घट झाल्याने शेतकऱ्यांनी भाजीपाला, फळ बागांना रात्रीच्या वेळेस पाणी द्यावे. तसेच जागोजागी पालापाचोळा पेटवून बागेतील तापमान नियंत्रित करण्याचे आवाहन केले आहे. जनावरांच्या गोठ्यात, कोंबड्यांच्या शेडमध्ये विजेचे बल्ब लावून घ्यावेत तसेच शेडभोवती बारदाने किंवा पडदे गुंडाळून घ्यावेत, जनावरांना पिण्यासाठी कोमट, स्वच्छ पाणीपुरवठ्याची व्यवस्था करण्याचे आवाहन कृषी अधिकाऱ्यांनी केले.
---------------------------
रोगाच्या प्रादुर्भावाचा धोका
हिवाळ्यातील कडाक्याच्या थंडीपासून मातीतील ओलावा टिकवण्यासाठी पालापाचोळा, पाचट किंवा प्लॅस्टिकच्या पत्र्यांचे आच्छादन केले आहे. मातीतील तापमान वाढून पीक संरक्षण होते. त्याबरोबर केळी, पपई पिकाच्या फळांना प्लॅस्टिकचे आवरण करावे. थंडीत वाढ झाल्याने आंब्याला मोहोर येण्यास पोषक वातावरण निर्माण होईल, तर मिरची पिकामध्ये भुरी रोगाचा प्रादुर्भाव होण्याची शक्यता आहे.