थंडीत ठाणे जिल्ह्यात पुन्हा बदलापूर अव्वल!

बदलापूरकर गारठले
१०.७° तापमानाची नोंद
बदलापूर, ता. ११ (बातमीदार) ः ठाणे जिल्ह्यात गुलाबी थंडी जाणवत आहे. यंदाही बदलापूरमध्ये सर्वात कमी तापमानाची नोंद झाली आहे. गुरूवारी (ता. ११) पहाटे शहरात तब्बल १०.७° सेल्सिअस इतक्या कमी तापमानाची नोंद झाली. हिवाळ्याची चाहूल लागताच गेल्या काही दिवसांपासून शहरातील नागरिक थंडगार वातावरणाचा आनंद घेत होते; मात्र आजची थंडी अंगात शिरणारी ठरली आहे.
हवामान खात्याचे अभ्यासक अभिजित मोडक यांनी दिलेल्या माहितीनुसार, सध्या उत्तर भारतातून येणाऱ्या थंड वाऱ्यांचा परिणाम संपूर्ण ठाणे जिल्ह्यावर दिसून येत आहे. त्याचा सर्वात मोठा प्रभाव डोंगराळ पट्ट्यात वसलेल्या बदलापूर क्षेत्रात जाणवत आहे. मोडक यांनी सांगितले, की हा थंडपणा पुढील काही दिवस कायम राहणार असून, संपूर्ण आठवडाभर तापमान १०° सेल्सिअसच्या आसपासच राहण्याची शक्यता आहे. पुढील आठवड्यात मात्र तापमानात काही प्रमाणात वाढ होईल, असा अंदाजही त्यांनी व्यक्त केला.
ठाणे जिल्ह्यातील आजच्या तापमानाची आकडेवारी पाहिली असता बदलापूर १०.७° ने सर्वात थंड ठिकाण ठरले. त्यानंतर कल्याण आणि पनवेल १३°, डोंबिवली १३.७°, नवी मुंबई १४.२°, तर ठाणे १४.६° तापमानावर नोंदले गेले. जिल्ह्यातील इतर शहरांच्या तुलनेत बदलापूरमध्ये अधिक गारवा जाणवत असल्याने नागरिकांनी सकाळी फिरायला जाणे, गरम पेयांचा आस्वाद घेणे या सगळ्यांचा आनंद लुटण्यास सुरुवात केली आहे; मात्र वृद्ध आणि लहान मुलांनी अतिरिक्त काळजी घेण्याचे आवाहन तज्ज्ञांनी केले आहे.