मनोज ढिले यांची माघार

बदलापूर, ता. ११ (बातमीदार) : कुळगाव-बदलापूर नगरपालिकेच्या निवडणुकीत दहा-ब प्रभागात मोठे राजकीय वळण पाहायला मिळाले आहे. भाजपमधून उमेदवारी न मिळाल्याने अपक्ष उमेदवार म्हणून रिंगणात उतरलेले मनोज ढिले यांनी अचानक अर्ज मागे घेतला. पक्षाचे प्रदेशाध्यक्ष रवींद्र चव्हाण यांनी दूरध्वनीद्वारे संपर्क साधून अर्ज मागे घेण्याचे निर्देश दिल्यानंतर, अनेक वर्षांपासून पक्षनिष्ठा जपणारे ढिले यांनी पक्षाच्या आदेशाला प्राधान्य देत निवडणूक लढवण्याचा निर्णय मागे घेतला.

२ डिसेंबरला पार पडलेल्या निवडणुकीत सहा प्रभागांचे मतदान तात्पुरते स्थगित करण्यात आले होते. न्यायालयाच्या सूचनेनुसार या प्रभागांतील पुन्हा मतदानाची २० डिसेंबरला निश्चित करण्यात आले. प्रभाग क्रमांक १९मधील शीतल राऊत या उमेदवाराची बिनविरोध निवड झाल्याने उर्वरित पाच प्रभागांमध्येच मतदान होणार आहे. अर्ज मागे घेण्याची अंतिम मुदत १० डिसेंबर होती आणि याच दिवशी ढिले यांनी माघार जाहीर केली.
दहा-ब प्रभागात ढिले यांच्या माघारीनंतर आता एकूण सात उमेदवार रिंगणात उरले आहेत. त्यामुळे येथील लढत अधिकच रंगतदार झाली आहे. सुरुवातीला या प्रभागात आठ उमेदवार होते; मात्र ढिले यांच्या माघारीमुळे भाजप उमेदवार शैलेश पडवळ यांना सरळ लाभ होईल, अशी राजकीय चर्चा सुरू आहे. शिंदे गटाचे उमेदवार आकीब कोहारी आणि भाजपाचे पडवळ यांच्यात मुख्य संघर्ष रंगेल, असे राजकीय निरीक्षकांचे मत आहे. स्थगित झालेल्या पाच प्रभागांपैकी दहा-ब हा सर्वाधिक चर्चेत असलेला प्रभाग आहे. २० डिसेंबरला होणाऱ्या मतदानाच्या पार्श्वभूमीवर येथील बदललेले राजकीय गणित शहरातील मतदारांसाठी उत्सुकतेचा विषय ठरले आहे. माघारीमुळे निर्माण झालेल्या नव्या समीकरणांचा प्रत्यक्ष फायदा कोणाला होणार, हे निकाल येताच स्पष्ट होणार आहे.